ود الأمانه ودهـا يارسولي
لأصحابي اللي عودو مثل الأغراب
تكفى قبل حزني وصمتي يطولي
ترى الرساله خمسة حروف بكتاب
لأصحابي اللي بالقسى ماصفولي
مدلولها شرهه ومضمونها عتاب
اللي إليـا ضـاقت بهم صوتولي
وأسكنتهم قلبي وعـيني والاهداب
وأن غـبت ضاقوا وأن حضرت أهتفولي
وكلٍ تبسم لي من الناب للناب
وياما قبل لحظة بشاير وصولي
تباشروا بي زيف في صورة إعجاب
وياما وياما آه ياما حكولي
وصدقتهم وأصدقهم اليوم نصّاب
شف كيف يوم احتجتهم ماوفولي
لا وحسافه كيف ظني بهم خاب
شده تزول أو جعلها ماتزولي
أن عودت رجلي على شجرة الداب
من قبل فرحة حاسدي مع عذولي
ومن قبل حزني لأقرب الناس ينساب
قلته وشاهد حجة الصدق قولي
وما أقول غير لشاهد الزور كذاب
وقت السعه يا كثر الأصحاب حولي
ووقت الشدايد لا حبايب ولا أصحاب
وحيد أقيس الهم عرضي وطولي
من سفح مرقابٍ على رأس مـرقاب
واللي قطع قلبي وسبّب ذهولي
أني قبل لا أحتاجهم كانوا أحـباب
كلمه صريحه ودها يارسولي
عن رفقة أصحاب الرخا خاطري طاب